04.06.2023

Was 🤪 iz isch alles uf schwiizerdütsch?

Ja genau, ich schribe iz alles uf schwizerdütsch und ich bennene uf was ich kei Bock ha und peile es neus Ziel ah, i dem ich uf mini Gfühl lose und ine gspühre, was ich denn stattdese gern würd welle gseh, mache oder wie nichs wett ha.

Ich ha i de letschte Mönet mich vel mit Start-up Themene, Business-Ufbou und enstprechende Strategie beschäftiged. Da hets vel spannends debi gha und dür de Prozäs be ich uf ne Art und wiis ou wirklich immer meh zu däm cho, wo mir eigentlich wichtig isch.

Und da ha ich vorallem eis gmerkt, wie wenig zyklisch und wiblich die Erfolgs-Strukture sind. Überall muess ich mich verbiege oder no meh Leiste, oder zerst e Therapie mache, damit ich denn voll Leistigsfähig bin, Bla Bla Bla Bullshit.

Mir wössed höt das üsi Gsellschaft und üses Lebe meh Ressource bruched als mir überhaupt hend. Mir gsehnd am CS-Crash das de Gigantismus und immer meh welle, irgendwenn eifach i ne tüüfi Krise füehrt und trotzdem sind alli Erfolgskonzept wo mir begägnet sind grösser, wiiter, besser, machs grad uf Schritdütsch denn so chansch ou grad de Märt in Dütschland und Östrich abgrase und no meh Mönsche erreiche, Performance isch wichtig, Perfektion isch de Schlüssel, süscht chansch grad abfahre, dini chunde sind Könige, du muesch genau das bringe was wönd, söscht springeds weder ab….

Hei Stopp, mis Ziel isch ned Sektefüehrerin z’werde sondern ich wett als ersts en Bitrag leiste, demit Froue, wie ich das ha chöne mache, ebenfalls Rüüm hend zum ihre Zyklus besser verstah und könne lehre. Denn das het mir i mim Läbe mega viel brunge, das ich verstande ha, ah oke das isch normal, das isch wege mim Zyklus. Und i ganz velne Hofflingslose, unmächtige Moment, wo ich wirklich i tüüfe persönliche Krise gseh bin, wil mir s’läbe ou eifach nur Trauma-Shit äne gworfe het, ha ich im Zyklus Chraft gfunde, weder neu azfah, neui Sache ufzboue, mir Hilf hole und weder zrugg is Läbe z’finde.

Das isch so mega Persönlich und Emotional für mich und iz ned imene negative Sinn, sondern eifach lebändig. Ich fühle mich unwohl das uf Hochdütsch z’mache, denn es isch es persönlichs Thema und am beste bin ich, wenn ich eifachd rüberd schwätze. I mim Hörbüech, mach ich das ou bewusst eso. Mini Sprach isch halt eifach mini Sprach, ich be i de Innerschwiz gebore und wohne sed ca. 13 Jahr im Ruum Züri und desshalb het sich halt das Chuderwälsch ergäh, wo ich iz da rede und so what. Wieso git mir üsi Leistigsgsellschaft z’gfühl ich sigi schlechter, oder keis guets Invest, well ich Bodeständig bin und lieber uf Chreislauf und Nachhaltigkeit setze?

Hei da chline Funfact, immerno isch Bible eis vo de Meistverchoufte Büecher uf de Welt, also Jesus het 12 Dudes gha, meh ned. Eis vo de aktuell erfolgrischte Business-Konzept isch e Art Spitex us Holland, «Buurtzorg» wo wenn sie wachsed und meh als 12 Lüüt sind, sich weder in chlineri Teams ufsplittet. Also längerfristig bruchemer Konzept, wo nachem Motto «Was bruch ich, was längt mir» funktioniered. Voilà zyklusheldin.ch macht da e Afang.

Und i dem Stil möcht ich ou anderi Mönsche, vor allem Fraue* empowere ihri «Kei-Bock-Mood» konstruktiv z’nütze, denn e Realität isch, entweder mir möched us üsem «Scheiss» öppis kontstruktives oder es wird im Läbe eifach alles zunehmender Beschisse und denn ischs ou irgendwenn mega schwierig, bzw es duuert denn eifach ou sini ziit, weder us dem use cho. Also Scheisse isch gnueg da, nützemer sie doch aktiv als Ressource für ne Umgstaltig.

Ich ha Luscht uf Mönsche wo ou Bock hend, sich mit dere Thematik usenand z’setzte, wo die Methode vo de Abentüür-Reis cool findet und wo gern mit Ressource wend schaffe. Ich ha kei Bock uf Suechmaschine-Optimierigs-Wahnsinn und Social Media Performance Opitimierig, ich ha Bock uf Lebe und us minere Erfahrig als Maltherapeutin Heldereise azleite wo anderi Mönsche e Ruum hend sich eigeverantwortlich mit ihrem Menstruationszyklus und all dene Aspekt wo das i üsem Gsellschafstläbe mitbring usenand z’setzte.

Mir läbed da i de Schwiiz imene Land wo ganz veles guet oder besser funktioniert als i anderen Länder aber glich mir hend da ou Problem und extrem destruktivi System. Mir fahlt oft uf, wenn ich en Misstand benne, wird das abgwertet mit, ja aber lug die in Afrika, dene geids no schlechter oder das sind iz aber ou weder Luxus-Problem. Ja verdammt, es sind halt teilwiis Luxus-Problem,
aber es stresst mich glich und ich bruche e Lösig. Und lueg Afrika isch mega wiit wäg vo mir, das heisst ned das ichs cool finde, wie’s dene geid, aber ich ha als Einzelperson ou ned de ganzi Kontinent rette und ich finde, mir wörded gschider die Mönsche det unterstütze i dem mer fräged, was sie bruched, anstatt ihne üsi alte Velos, Jeans und Brillene det abe z’schicke und ihne üsi Kultur und Werthaltige ufzdrücke.

Also Think global - act local - genau da möcht ich asetzte, anderi Mönsche stärche i dem sie ihri eigeti Ressource afönd schätze und meh is Läbe integriere anstatt nach Vorstellige z’funktioniere. Us de Psychologie wössemer ja ou das Weltschmerz üs eher lähmt und das es konstruktiver isch, lokal i mim eigene Wirkigsberich z’blibe - Also integrieremer doch das - wenn jedi und jede, wo cha, sini eigeti Welt rettet, hemmer scho ganz veli Problem nöme und chönd stattdese zäme s’läbe gniesse, bis die nächschti Krise chunt.

En witere Punkt isch zudem, mir redet immer vo Leistig und Afforderige und Visione, aber stellemer üs mal Frag, sind mir überhaupt i de Lag das z’Leiste? Hend mir Kapazitäte? Ich ha mir konkret so en Erfolgsplan gmacht und denn gmerkt, hei wenn ich das wirklich so riesig mache, denn ha ich gar kei Ziit meh zum Läbe, sondern muess ständig Sitzige mache mit mine Mitarbeitende, Problem bespräche und be wahrschinlech imene riesige Hamsterrad.

Ich wott cooli Abentüür-Reise kreiere, sälber mitmache und de Flow vo dere Methode gspühre, das ichs dir cha witergäh, ich ha Bock uf anderi z’inspieriere und e Bitrag z’leiste das mir meh in Chreisläuf dänked und mir Fraue meh eifach chönd so sie, wie mer sind, nähmlich #natürlichzyklisch.

Ja es wirds ned jedi / jede mega cool finde und mittlerwile isch es mir so scheiss egal - denn es ged ned nur s’negative, sondern s’positive isch ou da und überwiegt. Uf das vertrau ich, ich freue mich uf alli Mönsche wo das Format liebe und im Läbe e neui Würzi gänd mit ihrne Zyklus-Superchräft, ich freu mich uf cooli Themene i de Wunschbox uf minere Website, wo mer zäme chönd id Selbsterfahrig istiege. 

Ich freu mich, es Business uf zboue, wo finanziell mir es guets Läbe ermöglicht, ich im Summer cha ga Böötle uf de Aare und im Winter id Skiferie cha, ich mir e gueti Altersvorsorg cha ufbaue und ich cha öppis spare, falls mal mit minere Lunge öppis isch. Denn das isch für mich e wichtige Bode, wo mir Sicherheit bietet und Möglichkeit demit ich immer weder neui Folge cha produziere. Denn das isch ou öppis wo mir wichtig isch, ganz e hufe Mönsche hend mir empwohle, ich sölli das doch als Gratis-Podcast mache. Weisch das Gratis Bedütet? Es bedütet ich ha jedi Woche ca. 8h Ufwand öppis z’produziere, wo nüt dra verdiene. Es isch a de Ziit d’Leistig vo Froue anderst finanziell z’Bewärte und neui System z’finde. Hei die Usbildig zur Maltherapeutin isch ned ganz gratis gseh - und ich findes en faire Deal, das isch mis Wösse, mini Erfharig und mini Ziit mit dir Tusche gege Geld, du beschunsch ja ou öppis weder zrugg. E Investition i dis Läbe isch underem Strich unbezahlbar.

Also gnueg für hüüt - wenn du Bock und Luscht druf hesch - probier’s us - buech es abo - oder mach öppis anders wo dir spass macht. E schööne Sunntig wünsch ich dir.

Lg Zyklusheldin